• image
  • image
  • image
  • image
  • image
  • image
  • image
  • image
Previous Next
Bienvenue à l'ambassade de la R.D.P Lao
Bulletin d'informations en septembre 2013 PDF Print E-mail
Written by Administrator   
Friday, 27 September 2013 01:01

ວາລະ​ສານ​ປະຈຳ​ເດືອນ​ກັນຍາ 2013

 

         ສະຖານ​ເອກ​ອັກຄະ​ລັດຖະທູດ​ລາວ​​ເປັນ​​ຜູ້​ປະສານ​ງານຈັດ​ງານ​ວັນ​ຄອບຄົວ​ອາ​ຊຽນ 2013 ທີ່​ປາຣີ

         ວັນ​ຄອບຄົວ​ອາ​ຊຽນ 2013 ​(ASEAN FAMILY DAY 2013) ໄດ້​ຈັດ​ຂຶ້ນ​ໃນ​ມື້​ວັນ​ເສົາ, ວັນ​ທີ 14 ກັນຍາ 2013, ທີ່ ​ເມືອງຣິ ອໍຣັງຊິ​ສ (RIS ORANGIS) ຊຶ່ງ​ຕັ້ງ​ຢູ່ທາ​ງຕອນ​ໃຕ້​ຂອງຊານ​ເມືອງ​ປາຣີ ​​ເພື່ອ​ແນ​ໃສ່​​ຮັດ​ແໜ້ນຄວາມສາມັກຄີ, ​ມິດຕະພາບ ​ແລະ ການ​ຮ່ວມ​ມື​ໃນ​ລະຫວ່າງ​ບັນດາ​ສະຖານທູດອາ​ຊຽນດ້ວຍ​ກັນ ​ແລະ ​ໃນ​ບັນຍາກາດ​ຂອງ​ການ​ກ້າວ​ເຂົ້າສູ່​ຄວາມ​ເປັນ​ປະຊາ​ຄົມ​ອາ​ຊຽນ ​ໃນປີ 2015. ​​ໂດຍ​ອີງ​ຕາມ​ຮອບ​ວຽນ​ໃນ​ປີ​ນີ້, ສະຖານ​ເອກ​ອັກຄະ​ລັດຖະທູດ​ລາວ​ເຮົາ​​ທີ່​ປາຣີໄດ້ຖືກຜຽນເປັນ​​ຜູ້​ປະສານ​ງານ​ຈັດ​ຕັ້ງ​ສະຫຼອງ​ວັນ​ດັ່ງກ່າວ​ຂຶ້ນ.

         ​ໃນ​ງານ​ດັ່ງກ່າວ, ​ໄດ້​ມີ​ຜູ້​ເຂົ້າ​ຮ່ວມ​ຈາກ 10 ສະຖານທູດ​ອາ​ຊຽນທີ່​ປາຣີ (ບຣູ​ໄນ, ກຳປູ​ເຈຍ, ອິນ​ໂດ​ເນ​ເຊຍ, ລາວ, ມາ​ເລ​ເຊຍ, ມຽນມາ, ຟີ​ລິບ​ປິນ, ສິງກະ​ໂປ ​ແລະ ຫວຽດນາມ), ທ່ານ ​ເຈົ້າ​ເມື​ອງ ​ແລະ ຄະນະ​ກຳມະການປົກຄອງ​ເມືອງ ຣີຊ ອໍຣັງຊິ​ສ ຕະຫຼອດ​ຮອດຊຸມ​ຊົນຄົນ​ປະ​ເທດ​ອາ​ຊຽນທີ່​ອາ​ໃສ​ຢູ່​ປາຣີ​ເຂົ້າ​ຮ່ວມ ຊຶ່ງມີ​ຈຳນວນປະມານ 300 ຄົນ​.

         ​​ຄະນະ​ຈັດ​ງານ​ວັນ​ຄອບ​ຄົວ​ອາ​ຊຽນໄດ້​ຮັບ​ການ​ເອື້ອ​ເຟື້ອສະຖານ​ທີ່​ຈາກ​ເມືອງ ຣີຊ ອໍຣັງຊິ​ສ, ການ​ປະກອບສ່ວນ​ຊ່ວຍ​ເຫຼືອ​ທາງດ້ານວັດຖຸຂອງ​ຊຸມ​ຊົນ​ຊາວ​ລາວ​​ເຮົາທີ່​ປາຣີ ​ແລະ ການ​ຮ່ວມ​ມື​​ຈາກ​ສະຖານ​ເອກ​ອັກຄະ​ລັດຖະທູດຂອງ​ປະ​ເທດ​ອາ​ຊຽນດ້ວຍ​ກັນ ທີ່​ປາຣີ ​​ໃນ​ການກະກຽມ​ຈັດ​ງານຕະຫຼອດ​ເຮັດ​ກິດຈະກຳ​ຕ່າງໆຮ່ວມ​ກັນ​ໃນ​ງານ​ວັນ​ດັ່ງກ່າວ.

         ​​​​ໃນພິທີເປີດວັນຄອບຄົວ​ອາ​ຊຽນຄັ້ງ​ນີ້​, ທ່ານ ສົມສັກ ສຸຣິຍະວົງ, ເອກອັກຄະລັດຖະທູດໄທ ​ໃນ​ນາມປະທານ ຄະນະ​ກຳມະການອາ​ຊຽນທີ່​ປາຣີ, ​ໄດ້ຂຶ້ນກ່າວເປີດພິທີ​ເປີດ​ງານ, ພາຍຫຼັງ​ທີ່ ທ່ານ ຂັວນຕາ ຜາລີວົງ, ເອກອັກຄະລັດຖະທູດລາວ ໃນນາມເປັນຜູ້ປະສານງານ ຂອງ ASEAN Committee in Paris (ACP)​ໄດ້ຂຶ້ນກ່າວຮັບ​ຕ້ອນຜູ້ມາ​ຮ່ວມງານວັນ​ຄອບ​ຄົວ​ອາ​ຊຽນ ແລະ ທ່ານ ສະເຕຟານ ຣາຟາຣີ, ​ເຈົ້າ​ເມືອງ ຣີຊ ອໍຣັງຊິ​ສ ​ໄດ້​ໃຫ້​ກຽດ​ຂື້ນກ່າວຄຳເຫັນໃນນາມ​ຜູ້​ອຳນວຍ​ຄວາມ​ສະດວກສະຖານ​ທີ່​ຈັດ​ງານວັນ​ຄອບຄົວ​ອາ​ຊຽນ​ໃນຄັ້ງນີ້. ຈາກ​ນັ້ນ, ​ຄະນະ​ປະທານ, ບັນດາ ເອກອັກຄະລັດຖະທູດອາຊຽນ ​ແລະ ​ແຂກ​ທີ່​ຖືກ​ເຊີນໄດ້​ໄປ​ຢ້ຽມ​ຊົມ​​ຮ້ານ​ຂອງ​ແຕ່ລະ​ສະຖານ​ທູດ​ອາ​ຊຽນ​ທີ່​ວາງສະ​ແດງ​ອາຫານ​ອັນ​ເປັນ​ເອກະ​ລັກ​ຂອງ​​ແຕ່ລະຊາດ​ອາຊຽນ. ຈາກນັ້ນ, ​ໄດ້​ມີ​ການສະ​ແດງ​ສິນລະປະ​ຟ້ອນ​ລຳທີ່​ເປັນ​ເອກະລັກ​ຂອງ​​ບາງຊາດ​ອາ​ຊຽນ ​ແລະ ການ​​ແຂ່ງຂັນ​ກິລາ​ບາງ​ປະ​ເພດ​ເຊັ່ນ: ກິລາ​ເຕະບານ ກໍ​ຄືການ​ຫຼີ້ນ​ເກ​ມສຳລັບ​

 

ເດັກນ້ອຍ, ຜູ້​ໃຫຍ່ ​ແລະ ການ​ຈົກ​ສະຫຼາກ​ຈັບ​ລາງວັນ, ​ໃນ​ບັນດາ​ສະມາຊິກ​ຄອບຄົວ​ຂອງ​ສະຖານທູດ​ອາ​ຊຽນ ​ແລະ ຊຸມ​ຊົນຂອງ​ປະ​ເທດ​ອາ​ຊຽນທີ່​ດຳລົງ​ຊີວິດ​ຢູ່​ປາຣີຢ່າ​ງມີ​ຄວາມ​ເບີກບານ​ມ່ວນ​ຊື່ນ ​ແລະ ຄຶກຄື້ນຈົນ​ເຖິງ​ເວລາ 16:30 ​ໂມງ​ ຈຶ່ງ​ໄດ້​​ເລີກລາ​ກັນ.

ການ​ຜັນ​ຂະຫຍາຍ​ແນວທາງ​ການ​ຕ່າງປະ​ເທດ​ຂອງ​ພັກ ​ແລະ ລັດຖະບານ​ ມີຜົນ​ສຳ​ເລັດ​ຫລາຍ​ດ້ານ

        ອີງ​ຕາມ​ຂ່າວສານ​ປະ​ເທດ​ລາວ, ໃນໄລຍະ 2 ປີກ່ວາ ຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ກໍຄື ການ​ຜັນ​ຂະຫຍາຍ​ແນວທາງ​ການ​ຕ່າງປະ​ເທດເຂົ້າສູ່​ຕົວ​ຈິງ ​ແມ່ນ​ສືບຕໍ່​ໄດ້​ຮັບການ​ເປີດ​ກວ້າງ ​ແລະ ມີ​ປະສິດທິ​ຜົນ​ທີ່ພົ້ນ​ເດັ່ນ​ຂຶ້ນ ໂດຍ​ສະ​ເພາະ ​ແມ່ນ​ການ​ພົວພັນ​ຮ່ວມ​ມື​ໃນ​ຂອບ​ສອງ​ຝ່າຍ ພ້ອມ​ທັງ​ໄດ້​ເຄື່ອນ​ໄຫວ​ຢ່າງ​​ເປັນ​ເຈົ້າການ​ໃນ​ຂອບ​ຫລາຍ​ຝ່າຍ​ ເຮັດ​ໃຫ້​ຊື່ສຽງ​ຂອງ ສປປ.ລາວ ​ເປັນ​ທີ່​ຮູ້ຈັກ​ຢ່າງ​ກວ້າງຂວາງ, ຮັກສາ​ໄດ້           ຜົນປະ​ໂຫຍ​ດອັນ​ຊອບ​ທຳ​ຂອງ​ຕົນ​ໃນ​ເວທີ​ສາກົນ ແລະ ພາກພື້ນ, ນັບ​ທັງ​ການ​ເຊື່ອມ​ໂຍງ​ເສດຖະກິດ​ກັບ​ສາກົນ ກໍ​ມີ​ລັກສະນະ​ຕັ້ງໜ້າ ​ແລະ ​ເປັນ​ເຈົ້າການ​ຫລາຍ​ຂຶ້ນ.

         ຕໍ່ກັບຜົນສຳ​ເລັດ​ໃນ​ການ​ເຄື່ອນ​ໄຫວ​ວຽກ​ງານ​ການ​ຕ່າງປະ​ເທດນັ້ນ, ທ່ານ ເຈືອງ ສົມບູນຂັນ, ເລຂາທິການ ສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ໄດ້ແຈ້ງໃຫ້ຮູ້ໃນໂອກາດຖະແຫລງຂ່າວຕໍ່ ສື່ມວນຊົນ ກ່ຽວກັບຜົນສຳ​ເລັດ​ອັນ​ພົ້ນ​ເດັ່ນ​ຂຶ້ນຫລາຍ​ດ້ານ ໃນ​ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ໃນໄລຍະ 2 ປີ ​ໂດຍ ທ່ານໄດ້​ໃຫ້​ຮູ້​ວ່າ:​ ໃນ​ສະພາບ​ແວດ​ລ້ອມ​ສາກົນ ແລະ ພາກພື້ນ ທີ່​ໄດ້​ມີ​ການ​ຜັນ​ແປ​ຢ່າງ​ສະ​ຫລັບ​ສັບຊ້ອນ​ນັ້ນ ສປປ.ລາວ​ ໄດ້​ເຄື່ອນ​ໄຫວ​ວຽກງານ​ການ​ຕ່າງປະ​ເທດ ​ແລະ ​ເຮັດ​ວຽກ​ງານ​ການ​ທູດ​ຢ່າງ​ຕັ້ງໜ້າ ​ແລະ ສາມາດ​ຍາດ​ໄດ້ຜົນ​ສຳ​ເລັດ​ຫລາຍ​ດ້ານ ຊຶ່ງສະ​ແດງ​ອອກ​ໃນ​ການ​ພົວພັນຮ່ວມ​ມື​ໃນ​ຂອບ​ສອງ​ຝ່າຍ, ​ໂດຍ​ສະ​ເພາະ​ ກັບ​ບັນດາ​ປະ​ເທດ​ເພື່ອນ​ມິດ​ຍຸດ​ທະ​ສາດ ສສ.ຫວຽດນາມ ​ແລະ ສປ.ຈີນ ແມ່ນ​ສືບຕໍ່​ຮັກສາ​ໄດ້​ມູນ​ເຊື້ອອັນ​ດີງາມ, ທັງ​ສາມາດ​ເສີມ​ຂະຫຍາຍ​ເຂົ້າສູ່​ລວງ​ເລິກ ​ແລະ ນຳ​ຜົນ​ປະ​ໂຫຍ​ດຕົວ​ຈິງ​ມາ​ໃຫ້​ແຕ່ລະ​ຝ່າຍ​ເພີ້ມ​ຂຶ້ນ, ສ້າງ​ໄດ້​ຄວາມ​ເຂົ້າອົກ​ເຂົ້າ​ໃຈ, ຄວາມ​ເຊື່ອ​ໝັ້ນຊຶ່ງ​ກັນ ແລະ ກັນ, ສາມາດ​ດຶງ​ດູດ​ໄດ້​ການ​ລົງທຶນ​ຈາກ​ສອງ​ປະ​ເທດ​ນີ້ ນັບ​ມື້ຫລາຍ​ຂຶ້ນ. ຕໍ່​ກັບ ສປປ.​ເກົາຫລີ ແລະ ກູ​ບາ ກໍ​ມີ​ ການ​ພົວພັນ​ທັງ​ທາງ​ພັກ ​ແລະ ລັດ​ ເປັນ​ປົກກະຕິ, ມີ​ຄວາມ​ເຊື່ອ​ໝັ້ນ, ​ເຂົ້າ​ໃນ​ສະພາບ​ຄວາມ​ເປັນ​ຈິງ ແລະ ຄວາມ​ມຸ້ງ​ມາດ​ປາດຖະໜາ​ຂອງ​ກັນ ແລະ ກັນ, ມີ​ວິທີ​ການ​ຊ່ວຍ​ເຫລືອ​ກັນ​ໃນ​ເວທີ​ສາກົນ​ຢ່າງ​ສະ​ເໝີ​ຕົ້ນສະ​ເໝີ​ປາຍ ​ແລະ ຄ່ອງ​ແຄ້ວ, ສ່ວນ​ກັບ​ບັນດາ​ປະ​ເທດ​ໃກ້​ຄຽງ​ທີ່​ມີ​ຊາຍ​ແດນ​ຕິດ​ຈອດ​ກັນກໍ​ຄື​ບັນດາ​ປະ​ເທດ​ອາ​ຊຽນດ້ວຍ​ກັນ ເວລາ​ໃດ​ກໍ​ມີ​ຄວາມ​ພະຍາຍາມ​ສ້າງສັນ​ຕິ​ພາບ, ສະເຖຍລະ​ພາບ​ ​ແລະ ​ການແກ້​ໄຂ​ບັນຫາ​ນຳ​ກັນ​ຢ່າງ​ຈິງ​ໃຈ ​ແລະ ​ເປັນ​ຮູບ​ປະ​ທຳ, ຫລີກ​ລ້ຽງການ​ປະ​ທະ, ການ​ແຊກ​ແຊງ, ການ​ເອົາ​ລັດ​ເອົາ​ປຽບ​ກັນ, ສົ່ງ​ເສີມ​ການ​ພົວພັນ​ຮ່ວມ​ມື​ທາງ​ດ້ານ​ການ​ເມືອງ, ການ​ຄ້າ, ການ​ລົງທຶນ, ການທ່ອງທ່ຽວ, ການ​ເຊື່ອມ​ຈອດ, ເສັ້ນທາງ​ຄົມມະນາຄົມ, ​ໃນ​ນີ້, ອັນ​ພົ້ນ​ເດັ່ນ​ແມ່ນ​ການ​ຮ່ວມ​ມື​ໃນ​ການ​ກຳນົດປັກ​ຫລັກ​ໝາຍ​ຊາຍ​ແດນ ແລະ ການຮັກສາ​ຄວາມ​ສະຫງົບ​ຕາມບໍລິ​ເວນຊາຍ​ແດນ. ຕໍ່​ກັບປະ​ເທດ​ມະຫາ​ອຳນາດ, ​ແມ່ນ​ໄດ້​ຂະຫຍາຍ​ການ​ພົວພັນ​ຮ່ວມ​ມືກັບປະ​ເທດ​ມະຫາ​ອຳນາດ​ຂອງ​ໂລກ ​ໂດຍ​ການ​ຍົກ​ລະດັບ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ກັບ ຣັດ​ເຊຍ, ການ​ຮ່ວມ​ມື​ຮອບດ້ານ​ກັບ ​ຍີ່ປຸ່ນ, ກັບ​ ອິນ​ເດຍ ​ແລະ ​ໄດ້​ສົ່ງ​ເສີມ​ການ​ພົວພັນ​ເປັນ​ປົກກະຕິ​ກັບ ​ສະຫະລັດ​ອາ​ເມ​ລິ​ກາ, ກັບອັງກິດ ກໍ​ມີ   ລັກ​ສະ​ນະ​ບຸກທະລຸ ​ແລະ ​ໄດ້​ສົ່ງ​ເສີມ​ການ​ພົວພັນ​ເປັນ​ປົກກະຕິ​ກັບ​ສະຫະພາບ​ເອີຣົບ. ສ່ວນ​ກັບ​ບັນດາ​ປະ​ເທດ​ເອີຣົບ​ເໜືອ, ​ເອີຣົບຕາ​ເວັນ​ຕົກ ​ແລະ ຕາ​ເວັນ​ອອກ, ອົ​ສຕຣາລີ, ນີວຊີ​ແລນ ແລະ ບັນດາ​ປະ​ເທດ​ທີ່​ແຍກ​ຕົວ ເປັນເອກະລາດຈາກອະດີດ​ສະຫະພາບ​ໂຊ​ວຽດ ກໍ​​ໄດ້ມີ​ບາດກ້າວ​ຂະຫຍາຍຕົວ​ອັນ​ໃໝ່. ພ້ອມ​ນີ້, ຍັງ​ໄດ້​ເຄື່ອນ​ໄຫວ​ຢ່າງ​ຕັ້ງໜ້າ​ໃນ​ວຽກງານ​ຕ່າງໆ​ໃນ​ຂອບ​ການ​ຮ່ວມ​ມື​ອາ​ຊຽນ ແລະ ອົງການ​ຈັດຕັ້ງສາກົນ​ຕ່າງໆ ດ້ວຍ​ນະ​ໂຍບາຍທັງ​ຕໍ່ສູ້​ທັງ​ຍາດ​ແຍ່ງ, ທັງ​ສ້າງ​ບົດບາດ​ເປັນ​ປະ​ເທດ​ທີ່​ໜ້າ​ເຊື່ອ​ຖື​ໃນ​ເວທີ​ສາກົນ, ​ໂດຍ​ສະ​ເພາະ​ແມ່ນ​ການ​ນຳ​ປະ​ເທດ​ເຮົາ​ໄດ້​ຮັບ​ກຽດ​ເຜີຍ​ແຜ່​ຜົນສຳ​ເລັດ​ຕ່າງໆ​ດ້ານ​ການ​ພັດທະນາຕໍ່​ອົງການ​ຈັດຕັ້ງສາກົນ. ພິ​ເສດ​, ປະ​ເທດ​ເຮົາ​ໄດ້​ຮັບ​ກຽດ​ເປັນ​ເຈົ້າພາບ​ຈັດ​ກອງ​ປະຊຸມ​ລະດັບ​ສາກົນ​ສຳຄັນ​ຕ່າງໆ​ຫລາຍ​ຄັ້ງດ້ວຍ​ຜົນສຳ​ເລັດ​ຈົບງາມ. ຕໍ່​ກັບ​ການ​ເຊື່ອມ​ໂຍງ​ເສດຖະກິດ​ສາກົນ, ກໍ​ໄດ້​ມີ​ລັກສະນະ​ຕັ້ງໜ້າ ​ແລະ ເປັນ​ເຈົ້າການ ອັນ​ພົ້ນ​ເດັ່ນ​ແມ່ນ ສປປ.ລາວ ​ໄດ້​ເຂົ້າເປັນ​ສະມາຊິກ​ອົງການ​ການ​ຄ້າ​ໂລກ ​ແລະ ​ໄດ້​ເຂົ້າຮ່ວມ​ຢູ່ໃນ​ກົນ​ໄກ​ການ​ຮ່ວມ​ມື​ຕ່າງໆຂອງ​ອະນຸ​ພາກພື້ນ ແລະ ສາກົນ. ປັດຈຸ​ບັນ, ທຸກ​ຂະ​ແໜງ​ການ​ພວມ​ກະກຽມ​ຢ່າງຮອບ​ດ້ານ ​ເພື່ອ​ເຂົ້າຮ່ວມ​ເປັນ​ປະຊາ​ຄົມ​ເສດຖະກິດ​ອາ​ຊຽນ ​ໃນ​ປີ 2015 ແລະ ປະຕິບັດ​ພັນທະ​ຕ່າງໆ ​ໃນ​ການ​ເປັນ​ສະມາຊິກ​ອົງການ​ການ​ຄ້າ​ໂລກ./.

ສະພາ​ແຫ່ງ​ຊາດ​ພິຈາລະນາ ນະ​ໂຍບາຍກ່ຽວ​ກັບທີ່​ດິນ​ແຫ່ງ​ຊາດ

         ອີງ​ຕາມ​ຂ່າວສານ​ປະ​ເທດ​ລາວ, ການສະ​ເໜີ​ປັບປຸງຮ່າງ​ນະ​ໂຍບາຍ​ທີ່​ດິນ​ແຫ່ງ​ຊາດ​ ໂດຍ​ທ່ານ ດຣ.ອາຄົມ​  ຕຸ​ນາ​ລົມ, ລັດຖະມົນຕີ​ຊ່ວຍ​ວ່າການກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ, ​ໄດ້ມີຂຶ້ນໃນ​ມື້​ທີ 14 ຂອງ​ການ​ດຳ​ເນີນ​ກອງ​ປະຊຸມ​​ສະ​ໄໝ​ສາມັນ​ຄັ້ງ​ທີ ​5 ຂອງ​ສະພາ​ແຫ່ງ​ຊາດ​ຊຸດ​ທີ VII (25 ກໍລະກົດ 2013) ​ໂດຍ​ການ​ເປັນ​ປະທານ​ຂອງ ​ທ່ານນາງ ປານີ ຢາ​ທໍ່​ຕູ້, ປະທານ​ສະພາ​ແຫ່ງ​ຊາດ. ທ່ານ ອາຄົມ ​ຕຸນາ​ລົມ ​ໄດ້ຍົກໃຫ້ເຫັນເຖິງຄວາມ​ຈຳ​ເປັນ ແລະ ເຫດຜົນ ໃນ​ການ​ປັບປຸງນະ​ໂຍບາຍ​ທີ່​ດິນ​ແຫ່ງ​ຊາດ ​ທີ່ ໄດ້ກຳນົດ​ໄວ້ ໂດຍເນັ້ນໃສ່ 9 ບັນ​ຫາ ​ຄື:      ນະ​ໂຍບາຍ​ກ່ຽວ​ກັບ​ສິດ​ໃນ​ການ​ຄອບ​ຄອງ​ທີ່​ດິນ; ​ການຈັດ​ສັນ ແລະ ການວາງ​ແຜນ​ນຳ​ໃຊ້​ທີ່​ດິນ;​ ການ​ຄຸ້ມ​ຄອງ​ທີ່​ດິນ​ການ​ທົດ​ແທນ​ຄ່າ​ເສຍ​ຫາຍ​ຈາກ​ການ​ເວນ​ຄືນ​ທີ່​ດິນ; ​ການ​ບໍລິຫານ​ທີ່​ດິນ​ການ​ຮັບ​ຮູ້​ສິດ​ນຳ​ໃຊ້​ທີ່​ດິນ​ຂອງ​ຄົນ​ບໍ່​ມີ​ສັນຊາດ, ຄົນ​ຕ່າງ​ດ້າວ, ຄົນ​ເຊື້ອ​ຊາດ​ລາວ ​ແລະ ນັກ​ລົງທຶນ​ຕ່າງປະ​ເທດ; ​ຍຸດ​ທະ​ສາດ​ການ​ຫັນ​ທີ່​ດິນ​ເປັນ​ທຶນ; ການ​ດັດສົມ​​ເນື້ອ​ທີ່​ການ​ນຳ​ໃຊ້​ທີ່​ດິນ; ການ​ຕິດຕາມກວດກາ ​ແລະ ​ແກ້​ໄຂ​ຂໍ້​ຂັດ​ແຍ່ງ​ກ່ຽວກັບ​ທີ່​ດິນ, ພ້ອມທັງ      ເນື້ອ​ໃນ​ຂອງຮ່າງ​ນະ​ໂຍບາຍ​ທີ່​ດິນ​ແຫ່ງ​ຊາດທີ່​ສ່ອງ​ແສງ​ໃຫ້​ເຫັນ​ສະພາບ​ລວມ,​ ເນື້ອ​ໃນ​ຕົ້ນຕໍ​ຂອງ​ແຕ່​ລະນະ​ໂຍບາຍ​ ກ່ຽວກັບ​ທີ່​ດິນ ແລະ ການຈັດ​ຕັ້ງ​ປະຕິບັດ​ນະ​ໂຍບາຍ​ທີ່​ດິນ​ແຫ່ງ​ຊາດ.​​

         ທ່ານ​ ອາຄົມ ​ຕຸນາ​ລົມ ກ່າວຕື່ມວ່າ: ໄລຍະຜ່ານ​ມາ​ລັດ​ໄດ້​ເອົາ​ໃຈ​ໃສ່​ແກ້​ໄຂ​ບັນຫາ​ກ່ຽວ​ກັບ​ທີ່​ດິນທີ່​ເກີດ​ຂຶ້ນ​ໃນ​ສັງຄົມ ເຊັ່ນ: ໄດ້ມີມາດ​ຕະການ​ປ້ອງ​ກັນ​ ແລະ ​ແກ້​ໄຂ​ຂໍ້​ຂັດ​ແຍ່ງ​ກ່ຽວ​ກັບ​ທີ່​ດິນ, ປົກ​ປ້ອງສິດຜົນ​ປະ​ໂຫຍ​ດຂອງ​ເຈົ້າ​ຂອງ​ສິດ​ນຳ​ໃຊ້​ທີ່​ດິນ, ຮັບປະກັນ​ສິດ​ສະ​ເໜີ​ພາບ​ໃນ​ສັງຄົມ ​ແລະ ສິດສະ​ເໝີ​ພາບ​ ລະຫວ່າງ​ ຍິງ -ຊາຍ ​ໃນ​ສະພາບ​ຄວາມ​ເປັນ​ຈິງ​ກົດໝາຍ ​ແລະ ນິຕິ​ກຳ​ກ່ຽວ​ກັບ​ທີ່​ດິນ​ບໍ່​ໄດ້​ຮັບ​ການຈັດ​ຕັ້ງ​ປະຕິບັດ​ເທົ່າ​ທີ່​ຄວນ ແລະ ຍັງ​ພົບ​ບັນຫາ​   ຫຍຸ້ງ​ຍາກ​ສັບສົນ ​ກາຍ​ເປັນ​ອຸປະສັກ​ສຳຄັນ​ສໍາລັບ​ການ​ຫັນເອົາ​ການ​ຄຸ້ມ​ຄອງ​ທີ່​ດິນ​ເຂົ້າ​ສູ່​ລະບົບ​ກົດໝາຍ ​ແລະ ລວມສູນ​ໃນ​ທົ່ວ​ປະ​ເທດ ​ເຊັ່ນ: ການ​ຈັບຈ່ອງ​ທີ່​ດິນ​ໂດຍ​ບໍ່​ຖືກຕ້ອງ​ຕາມ​ກົດໝາຍ, ຂໍ້​ຂັດ​ແຍ່ງ ​ແລະ ຄະດີ​ກ່ຽວ​ກັບ​ທີ່​ດິນເພີ້​ມຂຶ້ນ, ການ​ຫັນປ່ຽນ​ປະ​ເພດ​ທີ່​ດິນ​ໂດຍ​ສະ​ເພາະ​ດິນ​ກະ​ສິກຳ (ດິນ​ນາ)​ ໂດຍ​ບໍ່​ໄດ້​ຮັບ​ອະນຸມັດ ​ແລະ​ ເຊັນ​ສັນຍາ ​ສຳ​ປະທານ​ທີ່​ດິນ​ ສໍາລັບ​ໂຄງການ​ການ​ພັດທະນາ​ບໍ່​ໄປ​ຕາມ​ຂັ້ນ​ຕອນ​ຂອງ​ກົດໝາຍ​ກຳນົດ​ໄວ້, ການ​ຊື້​ຂາຍ​ທີ່​ດິນ​ຂອງ​ຄົນ​ຕ່າງປະ​ເທດ​ໃນ​ນາມ​ຄົນ​ລາວ ​ມີ​ການ​ແຜ່ລາມ​ ແລະ ​ບັນຫາ​ອື່ນໆ. ​ສິ່ງ​ສຳຄັນ​ໃນ​ການ​ກຳນົດ​ນະ​ໂຍບາຍ​ນີ້​ຂຶ້ນ​ມາ​ ກໍ​ເພື່ອ​ເປັນ​ພື້ນຖານ​ບຸລະນະ​ແນວທາງ ​ແລະ ​ແຜນ​ນະ​ໂຍບາຍ​ຂອງ​ພັກ​ແລະ​ລັດ​ ກ່ຽວ​ກັບ​ວຽກ​ງານ​ການ​ຄຸ້ມ​ຄອງ ​ແລະ ບໍລິຫານ​ທີ່​ດິນ​ໃຫ້​ມີ​ປະສິດທິຜົນ​ຂຶ້ນ ​ໂດຍ​ຫັນ​ເອົາ​ພຶດຕິ​ກຳ​ຕົວ​ຈິງ​ທີ່​ເກີດ​ຂຶ້ນ​ຢູ່​ໃນ​ສັງຄົມ​ມາ​ປະກອບສ່ວນ​ຊ່ວຍ​ໃຫ້​ລັດຖະບານ​ມີ​ລະບົບ​ນິຕິ​ກຳ​ທີ່​ຄົບ​ຖ້ວນ ​ແລະ ສົມບູນ​ໂດຍ​ອີງ​ໃສ່​ທ່າ​ແຮງ​ບົ່ມ​ຊ້ອນ​ຂອງ​ປະ​ເທດ​ເຮົາ​ ເພື່ອ​ເຊື່ອມ​ໂຍງ​ເຂົ້າ​ກັບ​ພາກ​ພື້ນ ​ແລະ ສາກົນ./.

 
(Modification est en cours) PDF Print E-mail
Written by Administrator   
Friday, 25 January 2013 22:03

(Modification est en cours)

Last Updated on Friday, 25 January 2013 22:09
 

Information utiles

Ambassade de la République Démocratique Populaire Lao
74, Avenue Raymond Poincaré
75116 PARIS

Tél : (33) 1 45 53 02 98
Fax :(33) 1 47 27 57 89
contact@ambalaos-france.com

Horaires d’ouverture
du Lundi - Vendredi
Chancellerie : 9h00 - 12h00 / 14h00 - 17h00
Service consulaire : 9h00 - 12h00